السلام عليكم ورحمة الله وبركاته
انا اخوانى الكرام الحمدلله رب العالمين ربنا من عليا بالشفاء وده كان بفضل الله تعالى ثم بعد ذلك بمجهود اخونا الكريم الراقى المصرى اللى لا استطيع انه اعبر ليه عن جزيل شكرى ولا أملك له سوا ان ادعو له ان يغفر الله لى وله ويرزقه واهله حسن الخاتمه باذن الله تعالى


انا حالتى بدات مش عارف بالظبط المدة ولكن من زمن وانا بعانى من اعراض كتير اوى من كسل وخمول وخنقة وضيق فى الصدر وعدم توفيق ولا فى شغل ولا غيره الحمدلله رب العالمين
بالاضافة لسوء الظن اللى كنت بحس بيه لغيرى والنرفزة اللى هى اصلا مش من طبعى فانا انسان هادى بطبعى وصبور بفضل الله تعالى بس كنت بتنرفز كتير وبدون سبب على حاجة لا تذكر
كمان كان فى تداخل افكار بشع عندى يعنى كنت بفكر فى فكرة وفى نفس الوقت بفكر فى عشرين غيرها معرفش ازاى بس كانت بتحصل معايا
وكنت قمة فى التردد وكنت ممكن اروح اشترى بنطلون اقعد ممكن يوم عشان اقرر اشترى البنطلون ده طبعا موضوع صغير مبالكم فى الامور المهمة كنت بتعذب عشان اخد قرار من التردد
بالاضافة للخوف الشديد وضعف الثقة فى النفس اللى كنت بحس بيه فى اوقات كتير
وكنت بحس انى شخص تافهه مع انى عاقل ووقور بفضل الله تعالى والمقربين ليه بيعتبرونى حكيم بس انا بحس انى تافه ومليش قيمة
طبعا كان فى اعراض بحسها فى جسمى من نبض وتنميل وحرارة وكان كمان فى الم فى صدرى دائم ومستمر وخنقه والاخطر كان قلبى اللى كنت بحس بضربات قلبى عنيفه اوى اوى ومرة واحده بتختفى وتكون هادية وساعتها كنت بحس برعب ساعتها كنت بحس قلبى هيقف من الهدوء اللى كنت بحسه فى ضربات قلبى وكنت مرة فى صلاة العشا حسيت بنفس الاحساس فاترعبت بجد حسيت انى هموت وكنت هخرج من الصلاة فقلت لا انا هموت كده وانا بصلى وغير كمان معدتى اللى كانت دايما تعبانة ودايما حموضة باستمرار وصرفت لما شبعت عليها علاج ومفيش فايدة الحمدلله
لما الموضوع كبر بقه والامر تطور للقلب قلت لازم اروح اكشف اشوف فى ايه فرحت لدكتور وكشف عليه وادانى علاج مجبش اى فايدة فطلب منى رسم قلب عملت فشك انى عندى ضيق فى الشريان التاجى وهو بصراحة مش متخصص قلب فالمهم خدت علاج ورحت لاستشارى فاول ما شاف رسم القلب قالى قلبك مفهوش حاجة وسليم تمام قلت الحمدلله طبعا وقفت العلاج لان مفيش سبب طبى
المهم فى مرة واحد جارى بيفهم فى الامور بتاعت العلاج والجن حصل ان وضوئى اتنقض كذا مرة فخد اسمى وسام والدتى وبعد يومين قالى انت مسحور بسحرين طبعا انا عارف انه ده لا يجوز شرعا مسالة ان شخص يعرف باسم الشخص وامه وحرام
فالمهم ربنا يسرلى منتدى غير المنتدى ده بيعالج بالقران وهو للعلم مشهور جدا على النت فسجلت فيه وتابعت مع معالج ولكن للاسف الشديد وقف العلاج ورفض يكمل معايا كان شديد شوية معرفش ليه مع انه لازم يكون صبور مع المريض ويستحمله وانا مصدرش منى اى حاجة تجاهه بالمرة وكنت لطيف وكنت بكلمه كانه اخويا وبهزر معاه زى اخويا بس هو للاسف الشديد كان قاسى عليه وقالى كمل مع غيرى
المهم ربنا هدانى للمنتدى المبارك ده اللى انا افخر بانى عضو فيه وبجد للادراة تفخر بحسن اختيارها للرقاه اللى انا شفت عينه منهم وهو الراقى المصرى الى باكد ليهم انه عن حسن الظن كان معايا بفضل الله وعرف يحتوينى ويخرجنى من كبوتى بفضل الله تعالى
طبعا بدات العلاج وكنت بمشى فترة وبكسل فترة وبتعب فترة وكان الاخ الراقى المصرى دايما بيصبرنى وبيشجعنى وكان بيدينى الدافع انى اكمل بفضل الله تعالى
والاهم انه كان فاهمنى يعنى اجى استعبط عليه واقوله مش عارف اسمع القران المقرر عليه فى برنامج العلاج يقلى البس سماعه راس واسمع بيها بسيطة طب الجنى يعلم ايه بقه عشان يهرب من القران هههههههههههه فكنت بلبس وهو ونصيبه بقه اقله الشغل يقلى اسمع يعنى مكنش فى مفر منه هههههههههههه

المهم اخوانى انا بجد عايز اقول للى بيعانو لسه انهم يخلوا املهم فى الله وحده والله كنت بستغيث بالله وبدعيه دايما وكان عن ظنى بيه الحمدلله فبلاش يأس مفيش حاجة بتيجى بسهولة وبدون ثمن فاحتسبو الاجر عند ربنا وكملوا ومش عايز حد يستسلم لعدو الله وعدونا لازم باذن الله تنتصر عليه كملى وربنا هيعينك حتى لو المدة طولت شوية مش مشكلة كله بثوابه باذن الله وثق ان ربنا هيكرمك وهيوفقك وهيكون عن ظنك بيه بس بلاش تخلى عدوك يقنعك بانك هتفشل هتفشل باذن الله هتنتصر لعلمكم انا كانت بتجيلى اوقات ياس كتير وبقول خلاص هقف واعيش كده بس بفضل الله تعالى ثم بفضل الراقى المصرى جزاه الله خيرا كنت برجع تانى واكمل والحمدلله ربنا شفانى دلوقتى ومفيش نبض ولا سخونة وضربات قلبى بقت عادية وحاسس ان وضع قلبى مريح والضربات العنيفه بتاعت القلب اللى كنت بحسها فى صدرى وفى اكتر من مكان فى جسمى اختفت
لدرجة انى فكرت اروح للدكتور اكشف على قلبى احسن يكون الاحساس اللى انا حسه دلوقتى رغم انه مريحنى مش هو الطبيعى ههههههههههه ويكون العكس
انا بتوجه بشكرى لادارة المنتدى جزاهم الله خيرا على حسن مجهودهم واسال الله العظيم رب العرش العظيم انه يجعله فى ميزان حسناتهم باذن الله تعالى
واخص بشكرى الاخ المعالج المصرى اللى كان له الفضل بعد رب العالمين فى اللى شفائى لانه كان نعم الطبيب ونعم الاخ الموجه
عايز كل مريض هنا يستعين بالله تعالى ويقرر بانه باذن الله مش هيستسلم لانى انا حسيت بنفس اللى انتم بتحسو بيه بس انا باذن الله كملت وكملت والحمدلله خفيت
بس فى حاجة العفريت وحشنى ههههههههههههههههههههههههههههههههههه
اسال الله العظيم رب العرش العظيم ان ينفعكم بكلامى اللى كتبته يارب ويكون فى ميزان حسناتى باذن الله واسالكم الدعاء
غفر الله لى ولكم
سبحانك اللهم وبحمدك اشهد ان لا اله الاانت استغفرك واتوب اليك