|
خلاااااااااااص ملينا وش ذااااا
بسم الله الرحمن الرحيم موضوع اعجبني ولمست فيه واقعنا الذي نعايشه الان فاردت ان اقاسمكم الفائدة ******************** خلاص.... وشو ذاااا... ملينا .. ما صارت .. ما كتبت هذا الموضوع إلا من بعد ما حامت كبدي من اللي أشوفه قدامي ... ليه المجتمع الحين صاير سطحي بكل ما تعنيه الكلمة؟ أنا أعمم هالكلام على الحريم والرجال بعد بس بعلمكم أو أقصد بذكركم (لأني متأكده انه الكل ملاحظ هالشيء) باللي يصير بمجتمع الحريم بما إني عايشة بمجتمع ستاتي ... لا يقعد ينط على واحد و يقول يا مصلكم يالحريم .. تراكم انتم لاحقينا بعد.. ليه الناس صاروا يتكلفون بكل شي ... عزايم .. زيارات .. زواجات .. كل شي بمعنى كل شي؟؟ لو الوحده بيجيها أي أحد يزورها أول شي تفكر فيه وش بنحط ووش بنجيب ... لازم الحلى من المكان الفلاني ... والفطاير من المحل العلاني ... والسكر شكله كذا .. والصينية مدري وشي قايله كل ماهب و دب محطوط فيها ما بقي الا ينثرون على الأكل قليتر من الزبرقه الزايده .. ذاك اليوم أقول لأختي بجيب فطاير من المحل ( ...... ) اللي جمبنا قالت لا وع قروي ... من متى صار الأكل فيه قروي و مب قروي .. سلاماااااااات !! يازين أيام أمي كانت الدنيا بساطة كلن يزور الثاني والعشاء نواشف وان تحمسوا جابوا فول و تميس ... السالفة مب سالفة فقير و غني السالفة سالفة بساطة و تكلف ... وكلش كوم و إذا قال لك أحد والله الناس تقاطعوا هالأيام !!! كل هذا و ما تبون يتقاطعون ؟! ليه إذا ولدت الوحده صاروا الناس يتنافسون من يجيب الأغلى مب الأحلى ... تلقون إذا الوحده يجيها مدري كم طعش سله من باتشي واللي مثله و سعر السله الوحده ما يقل عن 500 طيب سلة سلتين بتفتحهم والباقي حراام وش تسوي فيه؟ .. ليه ما نسوي بيبي شور زي الأجانب و كل وحده تكتب قائمة بالحاجات اللي تحتاجها و تسوي زي الحفله البسيطه يجون فيها الناس منها انها ماراح يجيها هدايا الا الحاجات اللي تحتاجها ومنها انه تجمع الناس مره وحده و ما تقعد استقبل وودع طول فترة النفاس .. أكيد الناس بيستصعبونها بالبداية بس بعدين عادي بيتعودون عليها زي الحاجات الكثيرة اللي استنكرناها بالبداية بعدين صارت عادي .. ليه البنات صايرين ماصلين و سوالفهم مره ماصله ؟؟ أكبر همهم فلانة وش لبست .. والمحل الفلاني وش نزل .. يااي مره حلو التان عليك ... كلنا بنات و نحب هالسواليف بس مب عاد تصير اكبر همنا !! من متى الوحدة حتى لو لابسة شي يحوم الكبد بس عليه اللوقو حق الماركه يصير كشخه و لو وحده لابسه مرتب و ألوانه حلوه بس مب ماركه تطلع قوقو .. ما أتذكر قبل 10 سنين كنا نفكر كذا أبدا .. وأكبر دليل على هالشي ان السعودية إذا جت تشتري شي ماركة معينه أهم شي عندها ان اسم الماركه مبين و وش كبره يعني مو شاريته علشانه حلو بس علشانه الماركة الفلانية ... حتى الصغار صاروا لازم يلبسون ماركات لو سمحتوا والمشكلة الأعظم انه تلقين البزر توه ما فقش من البيضه و يقول ترى البولو حقي من رالف لورين !! ليه البنات بايعين صورهم بتراب .. مسنجر .. فيس بوك ... تاقد .. و غيره و غيره .. يعني خلاص إذا حطيتي صورتك صرتي مودرن و كول ؟ والا كلش كوم وإذا جت و صورت يدها ولا رجلها و لو سمحتوا لازم تكون ماسكه بيدها شنطه ماركه .. هو الأساس بالصوره إنك تورينا يدك ولا الشنطه؟ ما أدري نضحك على تطليع اليد ولا الشنطة !! ليه البنات بالمنتديات سبحان الله أكثرهم مصيفين بباريس و عندهم ( لو سمحتوا ترى البسه موضه قديمه) سياراتهم جاقوار و ينادون أبوهم وأمهم بابي و مامي ؟ ترى مره صدقناكم !! ليه الحريم صاروا يحطون ميك أب بالعزاء وشو ذا استغفر الله ... حطي بشفايفك مرطب و رتبي نفسك شوي ما أقول لا بس تجين بروج فوشي ولا مناكير أحمر ... خييييييييير !!! ليه الوحدة تقعد الليل كله لميييييين تطلع الشمس عالنت و تستخسر انها تصلي 10 دقايق قبل الفجر تدعي ربها فيها ؟ ليه الوحدة صارت كل ما كبرت تكشيرتها و ناظرت الناس بطرف خشمها صارت رزه و واو .. والوحده اللي تسلم على اللي ما تعرف ولا عالأقل تبتسم قدامه مخفه ولا معجبه باللي قدامها ... الرسول نفسه اللهم صلي و سلم عليه قال و تبسمك في وجه أخيك صدقه .... بس فيه أحد يسمع ؟؟ ليه الوحده إذا انعزمت على زواج صديقة صديقة صديقتها تدفع 500 1000 أو أكثر بعد على تسريحه بتقعد 3 ساعات هذا إن طولت بالزواج و تستخسر تدفع 100 و لا 200 على صدقة ؟؟ الناس قاعدين يموتون جوع وحنا قاعدين نضيع فلوسنا على حاجات سخيفة.. ليه بالزواجات كل وحده تناظر الثانية من بعديد و تقول منب قايمة أسلم ليه ما هي تجي تسلم علي ؟؟ المشكله لو تسألون أي أحد عن للي صاير بيقول انه مو عاجبه الوضع بس كلن يجاري الثاني و يقول مابي الناس يصيرون احسن مني انا وش ناقصني بعد. لازم أحد يبدا و يسوي شي لأن الوضع صاير من سيء لأسوأ .. متى بنغير اللي قاعد يصير إذا كان الكل ساكت ؟؟ ******************** عيـــــــــن العقل .. والله كلامها لالئ درر اللهم انت عفو تحب العفو فاعفو عنا تحياتي الخالصة للجميع اترككم في امان الله وحفظه مما راق لي,,, |
صدقتي يا اختاه ما علينا الا بالذعاء ربي يهديهم ويهدي جميع المسلمين
كثير اشياء بنات ورجال بتلاحظين اشياء غريبة تحدث وكلها مظاهر فقط ولا يرون الى الله ولا الى الاخرة فسبحان الله ولا الاه الا الله ولا حول ولا قوة الا بالله بوركتي اخية وحفظك المولى عز وجل على هذه التنبيهات والملاحظات دمتي بحفظ الله اللهم استرنا في الدنيا والاخرة |
من جد كلام في الصميم وربي جالسه اقرأ وأضحك الحريم صارت عقولهم فارغه وظنت الوحده فيهم انها مخلده في الدنيا ونست او تناست ان النهايه قبر متر x مترين الله المستعان جزاكـ الله الفردوس أختي أهله |
انا عن نفسي ماتهمني هذي الاشياء مثلا عندي عزومه اهم شي ينبسطوا ضيوفي ويطلعوا من عندي مبسوطين ومستانسين وحسب قدرتي بااضيفهم واهم شي الترتيب والنظافه اهم من وش باقدم لهم
اما بالنفاس انا ولدت مرتين على مفرش عادي وعلى الارض مو على سرير مع ان عندنا هذي الفترة صارت تطلع اشياء جديدة مثل مفرش النفاس وطقم للبيبي ولامه والله هذي اشياء ملها داعي اهم شي اني بصحه وطفلي صحته جيدة وكلها خمس اسابيع وانا طالعه من النفاس ليش اتخسر الف الفين على المظاهر بس هذي الفلوس ممكن بعد ما اطلع اتمتع فيها واسافر واقضي لي وللبيبي وانا الاحظ هذي الايام ان الناس ماعادت تتكلف نفس اول وكل الناس صارت محافظه على القرش لان العيشه صارت صعبه مومثل اول ايام الرخا والرفاهيه الحين ليت الواحد ياكل وياكل اولادة وباقي ناس للحين ماتركوا هذي العادات لاكنهم صاروا يحاسبوا مومثل قبل والله نفسي اتكلم عن الموضوع اكثر لكن اعرف نفسي لو انفتحت ما راح اقفل هههههههههه لان مثل هالمواضيع متشعبه ومالها نهايه لكن انا قلت رايي بشكل مبسط وما مريت على كل ماذكرتيه اختي لكن ربي يبارك فيك ويسعدك على المواضيع الطيبه الي تقدميها |
للاسف هذا واقعنا الله يصلح الحال يعطيك العافيه على النقل |
عزيزتي هذي الأشياء كلها أنا وأخواتي ما نسويها.. من كبر العقل أظن..
لكن الناس ما خلونا في حالنا.. يقولون بخلاء، وما يواكبون الحضارة... وبليدات.. وغيرها من الكلمات.. مع أننا أفضل منهم ديناً وعلماً ووظايف ولله الحمد. |
| الساعة الآن 04:57 PM. |
Powered by vBulletin
Copyright ©2000 - 2026, Jelsoft Enterprises Ltd.
سبحان الله وبحمده :: سبحـان الله العظيم