بسم الله الرحمن الرحيم
السلام عليكم ورحمه الله وبركاته
اسف للجميع على التأخير .. وخاصه اخوي ابو فيصل ..
والان نبدا في القصه على طول لاني ما احب المقدمات هههه
في البدايه انا انسان مالي علاقه بالكنوز والذهب .. والجن والرصد .. بس بدت قصتي مع الكنوز قبل فتره قليله .. وهي لها علاقه بالموقع ذا و أحد المشرفين .. وأحد مفسرين الاحلام ..
شخصيات القصة ( انا - أحد المشرفين - أحد معبرين الرؤى - الجني او الرصد )
المهم ..
في يوم من الايام رحت لمزعتنا وهي كبيره .. ومليانه بشي مهو طبيعي من العلامات والنقوش .. في البدايه انا كنت ماعرف عنها شي .. بس مره لقيت ناس حافرين فيها حفر .. على عمق 2 متر .. وبعضهم مكسر بعض العلامات الموجوده من قديم .. المهم قلت ياولد خلني اشوف السالفه .. ( حب استطلاع ) المهم دورت في الانترنت ولقيت الموقع ...
المهم اني استفدت من الموقع كثير ( جزى الله القائمين عليه خير الجزاء ) في معرفه العلامات وانه صحيح فيه كنوز وليست خيال او كذب ..
من هنا بدت قصتي : نزلت موضوع وفيه بعض الصور كأي موضوع في المنتدى طبعا اسال عن معنى العلامات .. المهم ارسل لي احد المشرفين رساله خاصه ( بدون ذكر اسماء ) وعلمني طريقه اقدر اكتشف من خلالها اذا فيه شي او مافيه ..
الاكيد اني ما طبقت كلامه على طول .. وحبيت اخذ اكبر معلومات عن الكنوز وقصص الجن .. بس تكون عن مزرعتنا .. وتوجهت للشياب من جماعتنا ( كبار السن ) وبديت بحثي عن المنطقه ..
المهم طلعت لي قصص مهي طبيعيه لدرجه اني جلست مع احد الاشخاص اللي صار لهم موقف مع الرصد .. وراح اقول لكم قصته .. في مزعتنا جبال وفي احد الايام من السنه يطلع عمود من الذهب بارتفاع 3 متر من اعلى الجبل ويختفي ثاني يوم وكل الناس تشوفه بس ما احد يقدر يروح له .. المهم ان الرجال اللي قابلته عمره الان حوالي 70 سنه قال لي القصه اللي صارت له بنفسه .. يقول وقتها كنت شباب وكان قصه عمود الذهب في وقتها هي كلام الناس قلت ليه ما اسوي طريقه ابين لهم ان اللي يشوفونه خيال ولافيه جن ولا ذهب ولا شي .. يقول قررت اجيب البندق ( السلاح ) وفي اليوم اللي يطلع فيه عمود الذهب اطلق عليه ونشوف وش يصير .. المهم تواعدوا هو واخوياه .. وراحو في نفس اليوم وبالفعل طلع لهم عمود الذهب .. المهم الرجال اطلق عليه بالسلاح .. يقول ( الكلام للشايب ) اول ما اطلقت على عمود الذهب حسيت ان واحد دخل حديده في عيني وطلعها من مكانها .. ويقول ما دريت عن نفسي الا انا في البيت وعلى عيني رباط وحولي اخويايي المهم قلت لهم وش السالفه لاني معاد اذكر اللي صار بعد ما طلقت على العمود .. يقول علموني اخويياي اني بعد ما اطلقت على العمود على طول رميت السلاح وجلست تصيح وانت ماسك عينك ويوم طالعنا فيك الا عينك على الارض ووجهك مليان دم .. واخذناك على البيت والحين توك صحيت ..
والرجال حي للان ( وهو من جماعتنا القريبين ) بعد قصته تأكدت ان السالفه مطوله ومستحيل اضحي بعمري عشان كنز وذهب .. العمر اغلى هههه
المهم قلت خلنا نشوف غير السالفه ذي ورحت أسال ناس من الجماعه حاولو في مواضيع الذهب .. المهم سمعت قصه ( ما قابلت صاحبها بس هو من الجماعه واللي ينقلها عنه من الجماعه بعد ) يقول انه راح للمغرب لساحر عشان يطلع له الذهب المهم مدري كيف قرأ في كتاب عند الساحر عن اسم المنطقه اللي احنا فيها وقرأ عن العمود حق الذهب .. ولقى اسم ثلاثه جبال مشهوره في المنطقه واحد منها اللي فيه العمود حق الذهب وموجود اسم المنطقه بعد .. المهم الساحر قال لهم هذي المنطقه ما اقدر اسوي لك فيها شي .. ورجع الرجال مثل ما راح وغسل يده من الذهب وطاريه هههه
المهم نرجع للموضوع : بعد ما جمعت هذي المعلومات قلت خلني اروح واجرب طريقه المشرف على العلامه ( وطريقته سهله ومافيها شي من الشركيات ) وطبعا اول ما جيت انا وواحد من اصحابي أذنت الأذان كامل وقرينا المعوذات وجربنا الطريقه ( وصار نفس الكلام اللي قاله المشرف ) المهم حنا ما كنا مستعدين للحفر ولا معنا شي .. قلنا بنرجع لها في يوم الخميس وحنا كنا في يوم الاثنين المهم عادي الوضع رجعنا ونسينا السالفه والوعد يوم الخميس .. المهم تحلمت حلم ( رؤيا ) وانا من الناس اللي يحب تفسير الاحلام والرؤى كلمت واحد من المفسرين ( وهو موجود بالمنتدى وانا ما عرفت انه يكتب هنا الا بعد ما فسر لي الحلم ) لاني علمته اني رحت للمكان عن طريق المنتدى وكلام احد المشرفين وقال لي انه بعد هو يشارك هنا بس ما يفسر احلام .. المهم طلع تفسير الرؤيا .. ( تفسير الرؤيا : يقول اني كنت امس انا وواحد من اصحابي كنا في مكان وبغى يجينا ( مس ) وقال لي انتبه لا عاد ترجع للمكان تراه خطير وحذرني منه .. ) مع انه ما كان يعرف اني رحت للكنز وسويت طريقه المشرف ..
المهم قلت ياولد توكل على الله والوعد يوم الخميس ومهو صايبنا الا ما كتبه الله لنا .. المهم كلمت خويي وقلت له السالفه وكلمت اثنين من اخوياي وقلت لهم ابيكم تروحون معي يوم الخميس صرنا اربعه اشخاص الحين .. يا حنا يالرصد هههه طبعا الكثره تغلب الشجاعه هههه بس قلت لهم كل واحد ياخذ دش قبل يجي ويحصن نفسه ويقرا المعوذات ..
المهم اخذنا ادوات الحفر وتوكلنا على الله يوم الخميس الصباح للموقع ....
يتبع في الجزء الثاني
|