مواقف من حياتي

بسم الله الرحمن الرحيم
وبه نستعين
الكل منا يعرف مدى حرص جداتنا على دينهم وعلى كل شيء يخص الدين من حديث اوآيه وعلى تربية أبنائهم التربيه الدينيه السليمه المهم بندخل محووور حديثنا وكيف انهم يروون الأحاديث على فهمهم لها
بحكي لكم قصة جميله جداً وصارت معي أنا شخصياً في يوووم من الأيام قدر الله وأن أنجبت خالتي طفل فأجتمعن كبار الحريم عندنا بالحارة (العجايز) طبعاً أنا ممن يعشق مجالسة النساء الكبيرات ودايم أنا وياهم في جدال بخصوووص الدين ورواية الأحااديث الضعيفه وجاءت عجوووز لها كلمتها المسموعه ولاأحد يقدر يتكلم معها قالت حديث عن الرسوول عليه الصلاة والسلام وأنا والعياذُ من كلمة أنا جالسة بينهم واهي قاعدة تحكي ونحن آذانٌ صاغية فتقول جات حرمة في عصر النبي وطقت باب بيت النبي وطقته ثلات مرات وافتحت الباب عائشه رضي الله عنها وقالت مساك الله بالخير ياعايشه (والله اني عاد ماأدري عايشه قلطتها والا ماقلطتها) بس الحرمه عجله وتبي تقابل الرسول قالت وين رسول الله قالت عايشه والله ماهوب فيه طالع قالت وش تبين فيه قالت أبيه يفسر لي حلم وتحكي الحلم قالت احلمت ان عمود البيت طااايح قالت عايشه رجلك بيمووت وقالت حلمت ان السراج انكسر قالت عايشه بتنجبين ولد أعوور المهم الكل قعد يثني عليها وأنا أمي محذرتني إذا شفت الحرمه ذي ياويلك وياسواد ليلك لو تجادلينها طبعاً أنا لزمت الصمت في هذه اللحظة لأن أمي تخاف منها ومن احراجها

*****************************
وفي يوم من الأياام كانت أمي قاعده تنصحني اني ماأروح مع السايق وقت الليل الى السووق لأنها تقوول ان السايق كبر في السن ولاعاد يشوووف زين في الليل ولاتروحين معه أخاف يجي عليكم حاادث المهم أنا قلت لأمي المكتوب بيصير ولانقدر نرده قالت أمي بس الله يقول( تدارا ياعبدي وأنا أدراك ) طبعاً الحين أنا قريت القرآن كله مالقيت الآية ذي قلت معليش يامامي ممكن تقولين وش معنى الكلام اللي تقولينه قالت أنتِ معلمه ماتعرفين معنى الآيه ذي والمفرووض إنا مادرسناك [ياعيني على الواثق]
وتقعد تفسرها وتقول ان معناها أن يحفظ الشخص نفسه من المهالك ووالله يقول أنا أحفظه وقعدت أنصحها وأقولها لاتقولين شيء ماتعرفينه يامامي هذا خطأ وأكبرخطأ وبينت لها ولكن لاحياة لمن تنادي لأنها واثقة من كلامها

***********************************
وبأيام العيد تعرفون وش معنى هالمناسبه وشلون إجتماع القرايب فيها وكانت لي خاله متزوجه واحد من الطبقه الراقيه وبنتها ماتجي عندنا إلا في المناسبات (خالتي مالها الا البنت هذي ) وبنتها دلوووعه مره مره وله ستة أولاد ماشاء الله الله يحفظهم لها . المهم قررت أمي في يووم العيد انها اهي اللي تبي تطبخ العيد في بيتنا من دوون مانوديه للطباخ وطبعاً بعد صلاة العيد وبعد ماأستعديت قلت بروح أساعد أمي في المطبخ وجات خالتي معها بنتها الأمووره ودخلن علينا في المطبخ وجلست بنت خالتي معنا في المطبخ أنا وأمي والشغاله وشغالتهم معهم وطلعت خالتي في الصاله لأن عيالها مجتمعين في الصالة أمي قاعدة تسأال بنت خالتي عن أحوالها وقالت لها بنت خالتي ماشاء الله عليك ياخاله تطبخين في البيت قالت أمي ايه أطبخ الأنبياء أشرف مني هم اللي يطبخوون في البيت قالت البنت والله قالت أمي والله حتى في القرآن يقول (وراحَ وجابَ عجلن حنيذ) تعرفين معنى حنيذ قالت البنت لا اليوم أنا بسوي لكم حنيذ يعني مشوووي شفتي انك المفروض مادرستي ماتعرفين في دينك شيء ولا حتى في حياتك (أمووت أنا في الواثق) البروفسور والله بديت أشك ان أمي آخذه الماجستير في الشريعة والتفتت لي بنت خالتي متعجبه من الآيه ومن هذه الثقه
وماكان مني إلا إن ابتسمت وهزيت رأسي !!!!!!!!!!!!!!!!!!!

*********************************
وفي رمضان كانوا يصلون التراويح والإمام يقرأ ووصل الآية اللي فيها كلمة (ببكة) وكانت جنبي جارتنا ويوم وصل الآية قالت استغفر الله أكثر من مره وطلعنا بعد الوتر واهي طولت وبنتها زميلتي في المدرسه قالت لي مادريتي أمي وش سوت البارح في المسجد قلت لا لأني طلعت بدري قالت وقفت تنتظر الإمام يطلع عشان تقوله أنت لك ثلاث سنين من يوم حطوك إمام لنا وأنت ماتعرف تقرأ الآيه زين وتأخر الإمام ماطلع وجات للبيت وقلنا لها ليش تأخرتي قالت لنا القصه .......... وتقول مايعرف يقرأ الكلمه هي بمكة وهو يقول ببكة وأنا لي سنتين على بالي انه مزكوم وهو مايعرف يقرأ ليش يحطووونه إمام تقول بنتها المشكله انها تتكلم بكل ثقه واحنا قاعدين نقنعها ان مكة لها اسم ثاني وعيت تقتنع في كلامنا حتى دقينا على أخوي وأقنعها لأنها ملزمه تمسك الإمام
وان شاء الله تكونون استأنستم مع هالمواقف والمشكله انهن متعلمات كلهن و متخرجات من محو الأميه
الله الله عااااد بالردود ولو مجامله ولو نصيحة أو طريقة لكيفية اقناعهن بالأخطاء حتى يتم تجاوزها

السلام عليكم ورحمة الله وبركاته
ياأختي المواقف مضحكة مافيه شك لكن انت نقلتي هذه الاخطاء عن نساء كبيرات لايوجد لديهن مرجعيه دينيه سليمه حتى لو درسن في محو الاميه انت معلمه اين دورك في تصحيح معتقداتهن الخاطئه ولا يجوز لك ابدا نقل الايات المغلطه والمنسوبه لله (أستغفر الله العظيم) وكلنا يعلم التحذير الالهي من الاستهزاء بالله او رسله او كتبه او اياته قال تعالى :{قُلْ أَبِاللّهِ وَآيَاتِهِ وَرَسُولِهِ كُنتُمْ تَسْتَهْزِؤُونَ لاَ تَعْتَذِرُواْ قَدْ كَفَرْتُم بَعْدَ إِيمَانِكُمْ} اكتفي بهذا والله الله يامربية الاجيال في توعية من حولك شكرا لله على نعمة التعليم حتى وان لم يكن تخصصك درسات اسلاميه الكل لابد ان يبلغ الدين ويصحح الاخطاء بالطريقة المناسبه.

مواقف مضحكة لكن يا ابنتي كله والدين والقرآن بما انك تعلمت واتممت تعليمك وجب عليك ان تجعلي لهم حلقات للذكر تعلميهم قراءة القرآن وتلقي عليهم بعض الاحاديث وشرحها ولك الاجر ان شاء الله .

أولاً شاكرة لك مرورك <قلبي الطاهر> والله اللي يده في المويه مو زي اللي يده في النار
وأنا من قال اني ماحاولت فيهن الله يهديهن بكل الطرق وشتى المحاولات لدرجة انهم ماعاد يحبوني جيتهم بالطيب وجيتهم بالقوه ولالانفع . وأمي الله يخليها لي كلش واثقة مرة مرة وتفاجئني عند الناس إذا رحنا لهم ماأدري الا قايله هالكلام .وكيف تبيني أرد على أمي بالله عليك قولي لي .قدام الناس أحرجها

شاكرة لك المشاركة (أبو حسام) ايوه انا أتممت تعليمي والحمدلله لكن أعتبر في نظرهم صغيره ولا أفهم بس أنا عندي فكرة وان شاء الله تنجح لأني بديت أطبقها عليهن واهن جالسات قبل فتره وتقريباً ست شهور دخلن مجال التجارة والبيع الحرام لبضاعة تكون في المحل وتبيعها على عشرة وهي جالسه في البيت وأنا مارضيت في الحركة وقلت لهم هذا ربا وقالن حتى الوراعيين تتكلم ورحت وجبت رقم الشيخ سعيد ابن مسفر القحطاني ودقيت عليه قبل اسبوعين وقال حرااااااام هذي الطريقة تكلم تقريباً خمس دقائق ينصح والحمدلله انجحت معهن .لكن أنا ندمااانه اني قعدت ست شهور ماكلمت أحد والحين لو يقولن أي آيه بدق على أي شيخ بس دعواتكم

بارك الله فيك العمر ليس مهم ولقد تعلمنا ممن هم اصغر منا سنا اكملي مابدأت وفقك الله وسدد خطاك .