استشاره عاجله

السلام عليكم و رحمة الله و بركاته

ارجو منكم مساعدتي ..
هذه مقدمه مختصره جدا ..
لكن اريد نصحي لمشكله عندي بالاسفل << باسرع وقت ممكن ..
اهم شئ تقرأي الكلام اللي مظلل بالكحلي ..

وجزاكي الله خيرا ..
----------
ابي متوفي منذ 6 اشهر << رحمه الله ..
امي انسانه سلبيه و تحب الشر "تناقض"ولكن والله تجتمع فيها هاتان الصفتان .
نحن عائلة باختصار تحب المشاكل مع بعضها البعض كثيرا لا اعرف لماذا , كل يوم مع اننا لسنا صغار ..
اختي الكبرى 33 سنه ,و انسه ,و مدرسة دين << و لا تطبق من الدين شيئا ولكن امام الناس صاحبة الورع و التقوى , تحب المشاكل كثيرا منذ ان كان عمرها 4 سنوات الى اليوم , كل يوم تخطط للمشاكل طبعا تخلي امي تساعدها .<< امي تموت عليها ومستعده تسجد لها مع انها لا تحترمها..
اخي 31 سنه ,موظف , متزوج منذ عام , يحب المشاكل و يريد فرض شخصيته من قبل ان يتزوج وايضا بعد الزواج , بعد ان كان ذا شخصيه ضعيفه جدا ولكن منذ 4 او 5 سنوات اصبح خبيث نفس << بعد ان اصيب والدي بجلطة + مرض الزهايمر ..
مسوي نفسه مطوع منذ 4 سنوات ولكن لا يطبق شئ حتى الصلاة لا يصلي ..<< امي تموت عليه ومستعده تسجد له مع انه لا يحترمها.
اخي واختي يحبوا ان يكونوا قدام الناس طيبين عارفه اغلب الناس يحسبونهم اطيب شئ , لانهم يحبوا يعموا انهم مثاليين ومتسامحين وهما اخبث من الخبث نفسه << اعوذ بالله ..
لكن الحمد لله انهما لا يتفقان و يكرهان بعضهما كرها شديدا ..
اخي الثاني عمره 30 سنه , طالب جامعي ,غير متزوج, سلبي , عصبي , اتكالي .<< متزاعل مع اختي الكبرى+ اخي الكبير + اختي الممرضه , لانهم عملوا فيه نذالات ولا اليهود ..
اختي الثانيه : عمرها 27 سنه ,ممرضه,انسه, لكنها همجيه جدا جدا , لا تحترم احد ابدا , تريد الجميع يحترمها ويتكلم معها بأدب << يعني مسموح لها تغلط على اي احد بالتصرفات او بالكلام و لغيرها لا , تزعل و تتحسس من اي كلمه , ولو احد طلبها المنديل اللي جنبها ما تعطيه احد تقول انا مو خدامه وما ابغى اعطيكي ولكن بالمقابل تبغى الجميع يخدمها ..
ايضا اختاي لا تحبان بعضهما البعض بتاتا البت ولا يتفقون ابدا الا عندما يسبوني و يخططون علي دائما ,لماذا ؟لانني دائما متفوقه ومثاليه في المدرسه "بعكسهما"و احصل على المرتبه الاولى ..
انا : عمري 26 سنه ,انسه,طالبه في الكليه حاصله على شهادة البكالوريوس وجلست في المنزل بعد التخرج لمدة 3 سنوات لا استطيع نسيانها فقد عوملت من امي واختاي كاني جاريه لديهم لماذا ؟ لانني لا اعمل ,حاليا اكملت دراستي لما بعد البكالوريوس وباذن الله وظيفتي مظمونه , لقد كنت انسانه سلبيه بكل ما تحمله الكلمه من معنى فلقد كنت اضرب من اختي الممرضه دائما و تسبني و تهزئني وايضا اختي المدرسة وانا لا ارد عليهم عشان خاطر امي لانني كنت احب امي و لكن مع السنين اصبحت ارد عليهم بدل الكلمه 10 و ما اسكت عنهم ابدا يمكن كرههم زاد لي حتى امي تكرهني لانهم تعود علي اني سلبيه وما ارد لكن خلاص طفح الكيل.
اختي الصغرى عمرها 17 سنه , قليلة ادب معايا مع انها كانت قمة في البرائه وهي طفله لكن منذ ان اصبح عمرها 4 او 5 سنوات غرسوا في قلبها كرهي وكانوا يحرشونها عليه بحكم انها طفله فكانوا يقولون لها سوي واعملي فيها ولو تمحرشتي فيها راح نخلي امي تشتريلك كل اللي نفسك فيه وبالفعل كان دولابها مليان ملابس وانا لا .. والله انها احيانا تنط عليه وتضربني بدون سبب وبدل ما امي تخاصمها هيه واخواتي كانوا يقولون عني انا الغلطانه .. لكن منذ سنتين اصبحت انا وهيه اصحاب جدا جدا سبحان الله بدون سبب يمكن لانها تغيرت عليهم و احيانا و ليس دائما صارت تعطيهم بدال الكلمه 10 "لكن ما تزال تخاف منهم"لانها قالتلي انها خلاص طفشت من حرشهم واعترفتلي بكل شئ كانوا يقولونه لها عني .<< لكن بالمقابل صار دولابها فاضي ما عاد هوه مثل قبل ..ولكن يعتبر برضوا احسن من دولابي ..
رغم اننا تصاحبنا الا انها احيانا تغلط عليه وتزاعلني بدون سبب ولما اسأله واقولها ليش ؟ تقول اسفه لسا كلامهم في راسي من جهتك لانها والله كانت تكرهني كره مو طبعي .. فكنت ارد عليها واقول لها مو مشكله انا مو زعلانه منك حتى لو زاعلتيني , فكانت تنحرج وتصالحني ..
لكن في نفس الوقت تزعل مني بسرعه على اي شئ رغم اني ما اهزئها او اجرحها بالكلام مثل اخواتي وهما يمكن تعدي لهم وما ترد عليهم . اما انا مستحيل تعديلي شئ حتى لو كنت مو قاصده ؟؟؟ ما اعرف ليش هيه كذا معايا , والله يحز في خاطري..

لسا في كلام كثير نفسي اقوله لكي , لكن عندي موضوع اهم بالنسبه لي حاليا وهو :
اختي الصغرى اصبحت تستخدم الابتوب حقي منذ 4 شهور يوميا طبعا انا وهيه منظمين الوقت بيننا , كانت تدخل العاب التلبيس و كنت اشوفها ولكن مره طلبتني اعملها ايميل فرفضت وقلتلها انا وانتي على ايميلي , قالت طيب واعطتوا زميلاتها .. لكن ما اعطيتها الرقم السري حقي , كنت انا اللي افتحوا لها ..
مره جاءت وقالتلي بنت جيراننا تبغاكي تعمليلها ايميل لها ولاختها قلتلها طيب وعملتوا ..
بعدين اكتشفت انو الايميل الثاني لاختي وتدخل عليه وانا ما اعرف وعرفت بالصدفه وسالتها نكرت وخليتها تفتحه , المهم لقيتها ضايفه ناس كثير وفتحت البريد لقيتها مسجله في الفيس بوك و في منتدى فيه قروب "مثل الشات"شباب وبنات ..
خاصمتها خصام وقلتلها ليش جلست تحلف انها مو هيه انو بنت الجيران هيه اللي مسجله في الفيس بوك وفي هذا المنتدى ..<< وقلت لاختي الممرضه عنها عشان لما تستخدم لابتوبها ابغاها تفتش وراها << لكن والله اختي الممرضه عادي عندها ..
طبعا اختي الصغيره قبل قد مسكتها مرتين وهيه داخله شات والاقيه في المحفوظات والمشكله انها تنكر كل شئ وتحلف ..طبعا انا ما اقولها انه في المحفوظات عشان لا تمسح شئ ..
المهم رحت عملت حفظ للمحادثات عشان يكون ظني في محله مو كذب ..
ولقيتها تكلم شباب , انا مو مصدقه ومنصدمه ومو عارفه اقول لمين
لانو في البيت عندنا ما تقدري تقولي لاحد شئ بعدين ينقلب الموضوع شخصي ..
المهم كنت كل يوم بعد ما تعطيني هوه افتح السجل واقرا ولا كنت عارفه ايش اعمل ..<< تخيلي لو كنتي مكاني ايش راح تعملي , ما اقدر اقول لامي لاني اعرفها ما راح تسوي شئ وراح تزاعلني انا وتحقد وتقلب علي ..
المهم بعد فتره شكل اختي لقيت الملف , ما اعرف كيف؟ و صارت تمسح كل يوم اللي فيه , ولا كلمتها خليتها تمسح كل يوم بيومه ..
صارت تتحاشاني وما تكلمني ورجعت لسفاهتها عليه وتسبني وتزاعلني كل يوم وانا اعمل اني ما اعرف هيه ليش مزاعلتني ..
وارجع اكلمها وهيه ترجع تزاعلني , المهم انو قبل رمضان بيوم كلمتها وقلتلها حرام حرام حرام وجلست تبكي وتحلف وتقول مو انا ولما قلتلها انا منزله برنامج يفتح كل صفحه تفتحينها بكت واعترفت , وقلتلها انا حافظه كل شئ عندي بدل اللي مسحتيه ..
وقلتلها رمضان لازم تبتدين بدايه جديده ومن هذا الكلام .. من بعدها ما عاد تدور لابتوبي وصارت تستخدم حق اختي << سبحان الله اختي الممرضه كانت ما تعطي اختي الصغيره لابتوبها اللا بالقوه و بالمحايله وهيه اصلا شاكه انو في شئ بيننا فصارت تعطيها هو كل يوم ..
المهم حاولت ارجع اتصاحب مع اختي الصغيره من جديد واجلس جنبها لما تكون على الابتوب ومثل ما قلتلك كانت تزاعلني "اكيد عشان ما اجئ اجلس جنبها" وانا كنت اعمل انو ماني فاهمه انها مزاعلتني << اختي غريبه انا اعرف البنات اللي مسوين شئ غلط يخافوا هيه لا مو خايفه اني اعلم عليها .. تخيلي في يوم يمكن 6 رمضان قالتلي باعلى صوت وبكل وقاحه : انا ما ابغى اكلمك انتي ما تفهمين .. قلتلها ليش قالت كذا انا اكرهكي , قلتلها اوكيه : خلاص ما نتكلم ..
المهم اخواتي فرحانين انو بعد ما كنا اصحاب رجعنا تزاعلنا .. لانو انا والممرضه متزاعلين لنا شهر << صحيت هيه من النوم وما تكلمني وبدون سبب ؟؟؟!! .. اعتقد مريضه نفسيه "اللهم لا شماته"

صارت تعطيها الابتوب يوميا وباين انها جالسه تكتب بسرعه ولكن ما احد راضي يكلف نفسه ويشوف على ايش داخله حتى امي نفسها اللي كانت مانعه النت عليه وما استخدمتوا والا عمري لما صار 23 سنه ودائما كانت تنط بالدس عشان تشوف ايش انا داخله صار مع الصغيره اللي عمرها 17 الموضوع عادي ..

في الاخير حكيت امي وقلتلها المفروض تجلس جنبك وحسسيها انو انتي اللي انتبهتي لها من نفسك مو احد ثاني نبهك عشان تخاف منك << هيه مو مره تحسب لامي حساب , تخاف من اخواتي اكثر من امي .. لما امي تجلس جنبها تجلس تتنفخ على امي , ما هي خايفه ..

تحسبين انو امي مهتمه بالموضوع .. فقط اليومين الاولى جلست جنبها وبعدين خلاص ما تبغى تتعب نفسها او تشيل هم "عادي عندها اهم شئ ما احد يزعجها" ولما اذكرها واقولها يا امي ليش ما انتي مهتمه بالموضوع بنتك لسا صغيره والله بعدين تخرب لما تكبر , تقولي انا مهتمه بس ايش تبغيني اسوي ؟؟ هذه اجابة ام ..
امي كلمت اختي الممرضه وقالتها لا تعطين اختك الصغيره الابتوب لانها جالسه عليه طول اليوم , ولما ياذن المغرب ما تجئ تفطر على طول << كياد في امي صارت الممرضه اللي تشيل الابتوب معاها كل يوم للدوام صارت تترك مع اختي الصغيره ولما امي تقولها خذيه منها قدامها تقولها : لا << طبيعيا ما راح تحسب الصغيره لامي حساب , وامي ما تبغى تتعب نفسها , كمان امي تعرف انو هذا الموضوع مضايقني على اختي فتحب تكايدني بزياده والله بذات هذه اليومين ما عاد تجلس جنبها وتشوف ايش داخله ..

انا واثقه انو امي ما راح تحكي اختي الكبيره "لانها تحب تصطاد على اي احد شئ" << مع انو امي تعلمها بكل شئ حتى لو احد عطس .. لكن امي تخاف انها اختي المدرسه تذلها بهذا الموضوع وتهددها به و انو تعلم اخواني << تحب المشاكل ..

ولا راح تحكي اختي الممرضه عشان قبل كذا انا سمعتها تكلم واحد بجوالها وعلمت امي , وامي تعرف اختي انو تعملها لكن امي تخاف من اختي مره مره مره , فسكتت عن الموضوع وانا كل يوم اسمعها واروح اكلم امي , وامي ولا شئ وتهددني وتقول لا تقولي لاحد وما لك صلاح ..

طبعا امي تخاف من اخواتي عشان موظفات ومعاهم رواتب وكل وحده تهدد امي في اي شئ لو ما سمعت كلامهم ..

ورحت قلت لاختي المدرسه << غصبا عني لانو هذا الكلام كان قبل 4 سنين وفي نهار رمضان وانا ما قدرت اسكت .. اختي المدرسه ذكيه لانها خبيثه طبعا هيه ما راحت كلمت اختي الممرضه لا عملت فيلم طويل والله لو اقولك عليه << تقولي انو ابليس يجئ يتعلم منها..

وضغطت اختي على امي انو تواجه اختي الممرضه .. المهم امي كلمتها و لكن ما عملت شئ غير انو خلت اخويه يمنع عنها الجوال لكن ما قالتلو السبب ..
مو اقولك كل شئ عندنا ينقلب شئ شخصي << يعني كل واحد يستغل الموقف و ينتقم منك مو عشان انتي غلطتي : لا , عشان هوه يكرهك ..

فاختي الصغيره عرفت انو اختي الممرضه كلمت ولد من مين ؟ من امي .. وشافت كل شئ قدامها .. لم يكن هناك رادع ولا شئ يذكر .. بالعكس امي ما زاعلت الممرضه زاعلتني انا والله 4 سنوات والسبب اختي الكبرى استغلت الموقف مثل ما قلت : كل شئ انتقام شخصي .. والممرضه تخليها تروح وتجئ كل مكان والله ترجع مع السواق لحالها الساعه 4 الفجر << تزور صاحباتها ..
مسموح لاخواتي انهم يروحوا اي مكان ولحالهم عشان معاهم راتب وكل وحده تدفع فلوس السواق ..

وانا اي مكان لحالي مرفوض .. ولا اروح ازور احد ..

المهم اكيد اختي الصغيره راح تقول في نفسها لو عملت مثل اختي الممرضه امي ما راح تقولي شئ ولو امي كلمتني راح اهزئها بكلمتان وارفع صوتي عليها وهيه راح تسكت << حتى اختي هذه صارت تهدد أمي ..

والله مره ما انساها ومن بعدها خلاص صرت اكره امي :
قلتلها انتي ليش تسمحين لاخواتي يروحوا ويجوا لحالهم مع انك عارفه انهم ما يخافون منك وجريئات وما يحسبون لكي حساب , وانا كل مكان تقوليلي ما تروحين لحالك انا معاكي : جوابها : انا استفيد منهم لكن انتي بأيش استفيد منك ..<< لو سكتت ارحم , انا متأكده انو هذا السبب لكن ما توقعت انها تقولوا بالمفتشر ..

انا ايش اعمل , والله ما بيدي شئ ..
المشكله عندنا في البيت كل واحد متزاعل مع الثاني , ما اعرف ليش هذا الكره؟

هذا الموضوع بعد الاختصار ..
واسفه على الاطاله ..
جزاكي الله خيرا ..

للرفع ..

للرفع ..

جزاكم الله خيرا ..

بسم الله الرحمن الرحيم
اللهم صل على محمد وعلى آله وصحبه أجمعين
عزيزتي

تعانين من التوتر في علاقتك مع أمك واخواتك لذاتكثر المشاكل والخلافات بينكما ، ولاتجدين سبيلا للحوار والتواصل مع والدتك او اي احد في البيت لذا لاتستطعين ان تحلي مشاكل البيت الا بعد ان تقوي العلاقات الاجتماعية بينكم وروابط الاسرية و من كلامك انكم عائلة مشتتة كل فرد يعيش بشخصية مستقلة عن الجميع وكل واحد منكم ابتداء بوالدتك ليس له دور لذا انصحك اختي ان تستشيري مراكز الاستشارات الاسرية حتي تستطعين ان تعيدي كيان اسرتك .

اختي من خلال كلامك يتضح انكم اسرة غير سعيدة لان الأسرة السعيدة هي اللتي يسود التعاون المشترك بين أفرادها فالتعاون يوطد العلاقات ولايدع مجالا للتفكك الأسري علي الرغم انكم جميعا وصلتم الى مستويات في التعلم يعجز عنها كثير من الافراد ولكنها لم تخدم اي شخص منكم .

اختي ابدي بنفسك واسألي نفسك مالذي يزعج والدتك منك لانه لايوجد مايجعل الام تكون سلبية مع اولادها الا الضغوط النفسية التي تواجهها ثم استعيني باالله وتوكلي عليه من خلال استشارة اخصائي نفسي ممكن يساعدك علي اعادة التوازن و الاستقرار لنفسك ثم اعادة الهيكل الاسري لعائلتك .

كل عام وانتي بخير ..
هل تعرفي رقم او عنوان اخصائية نفسيه او مراكز الاستشارات الاسرية ..
و جزاكي الله خيرا ..

اقتباس:
المشاركة الأصلية كتبت بواسطة إستغفر الله
كل عام وانتي بخير ..
هل تعرفي رقم او عنوان اخصائية نفسيه او مراكز الاستشارات الاسرية ..
و جزاكي الله خيرا ..



في مكه ؟؟!!

و شكرا

بسم الله الرحمن الرحيم

اختي الفاضلة اسئل الله العظيم رب العرش العظيم ان يشفيك ويلبسك ثوب العفاف والعافية .

اختي باالنسبة لسؤالك اعرف بعض المستشفيات عن طريق الدراسة والبحث منها:

مستشفى النور التخصصي يعمل فيها سبعة إخصائيين وثلاثة استشاريين.

مستشفى الملك عبد العزيزوباالاظافة الى مستشفى الصحة النفسية في الطائف.

جزاكي الله خيرا ..