قصه اغرب من الخيال

--------------------------------------------------------------------------------

إعزائي أعضاء المنتدى هذه القصه أتتني على الإيميل ولروعتها حبيت أن أضعها بين ايديكم

القصه اللي راح اتكلم عنها ماهي من فلم مصري او مسلسل سوري اواردني .
قصه حقيقيه وانا اعرف صاحب القصه شخصيا وله عندي اكثر من 40 قصيده بخط يده تتحدث عن معاناته وان شاء الله اختار منها بعض القصائد اللي احس انها اكثر تأثير



بدايه القصه عن واحد راح ارمز لاسمه باسم ( علي ) واتكلم على لسانه مثل ما سمعتها منه ( كان يتكلم والعبره تخنقه ولا يقدر يرفع نظره من الدمع ) .


يقول علي ( ويقسم بالله على ما يقوله ) :
بدايه القصه انا ما اتذكرها لكن حسب ما سمعت وما وصلي من اخبار
يقول علي :

كان ابوي بدوي ولا يملك سياره واحواله صعبه وكان عمري سنه وقتها وكان عام 1380 هـ ( 1961 م ) .

يقول علي : مرضت مرض خطير ما يعرف ( دخلت بسببه في غيبوبه )
دور ابوي احد يوديني للمستشفى كانت السيارات قليله وقتها وبعد ما يأس حصل له واحد تبرع يوديني للمستشفى .

رحنا للمستشفى وكشفوا علي وقتها كانت الإمكانات قليله وبعدما كشفوا علي طلبوا ابوي وبلغوه ان حالتي ميؤس منها .


جلس الوالد ينتظر وما يعرف عن مصيري وصاحب السياره بدأ يتململ ويبي يرجع لان الحاله طولت بدون تحسن .


استدعى الطبيب الوالد وبلغه اني فارقت الحياه وطلب منه انه يستلم الجثه يدفنها .

استعجل الوالد بسبب صاحب السياره وطلب من المستشفى انهم يغسلوني ويدفنونني وافقوا المسؤلين في المستشفى وراح الوالد لأهله .


يوم وصل الوالد لاهله بلغ الوالده بوفاتي بس ما صدقت اني ميت وصارت تبكي الليل والنهار ما استوعبت اللي حصل .


يقول علي ما الله كتب اني اموت بس اللي حصل من الطبيب ما كان مفهوم . تحسنت صحتي ما احد جاني يسأل عني راحت الايام ما جاني احد يستلمني . بعد فتره تبرع واحد من اهل القريه اللي المستشفى فيها انه يربيني وكان وقتها عقيم استلمني وشهدوا عليه واخذني .

يقول بعد ما اخذني لعب عليه الشيطان بعد ما اقنعته زوجته انه ينقل من ال***** ويسجلني ولدٍ له ولا احد يدري وفعلا نقل على طول من الديره واهلها اللي يعرفون ان ماني ولده .

بعد اقل من شهر مرضت امي الحقيقيه من كبر همها ما صدقت اني ميت وجابها ابوي للمستشفى اول ما دخلوا سألوا عني وعن مكان قبر على شان تقتنع امي قالوا لهم المستشفى القصه وان ولدكم عند فلان في نفس الديره
طلعوا دوروا سألوا يمين يسار ما حصلوا خبر رجع ابوي امي للخيام ورجع يدون عن اللي اخذني ما حصل خبر بحث عنه الين يأس .


بعد فتره : الناس اللي انا عندهم رزقهم الله وجالهم بنت وكنت آمر عليها وتطيعني وتحترمني وكل شي اطلبه تنفذه ما شكيت في أي شي .

كبرنا ويوم وصل عمري تقريبا 17 سنه وهي حوالي 14 سنه
وفي يوم من الايام وانا راجع للبيت حصلتها واقفه على الباب كاشفه مديت يدي عليها وضربتها ليه تطلعين كاشفه .

ردت علي بنغمه فيها زعل



((((لا تضربني يا اللقيطه ))))

يوم قالته انا ما كنت ادري عن قصدها انهلت عليها ضرب وهي تنادي امها و تردد

(( اتركني يا اللقيطه ))

جات امي ( اللي كنت احسبها امي ) وقالت وش فيه قلت لها اني حصلتها كاشفه وضربتها وقالت لي ياللقيطه وزدت ضربها

يقول ردت الام تقول :


أي نعم لقيطه وتضرب بنتنا ما يكفي انا مربينك ونصرف عليك .

يقول ما ادري اصدق اكذب يمكن انها قالتها في وقت زعل ما تقصد .

توجهت لبيت عمتي يقول ما ادري انا وش امشي عليه ما ادري رجلي تنوش الارض او لا وصلت بيت عمتي دقيت الباب وطلبتها وجات وقلت لها حاولت تهديني ما قدرت وصارحتني بالقصه بالتفصيل .
طلعت من عندها وتوجهت للرياض ما وادعت احد حتى اللي رباني وكنت احسبه ابوي ما قلت له شي .

ومن القصائد اللي عندي له وكان دايما يرددها بس ما وضح لي في كتابته لها هل هي له او انها منقوله
يقول :




حداني على مران مرنٍ وراه أمرار = ولا تنشدوني خلوا القلب باسراره
انا لو شكيت الهم والجو فيه امطار = تبدد غيوم الجو وتوقف امطاره
سبب قصتي لو قلتها وسط مجلس بار = يطير السكار اللي دخل راس خماره
ومن هو لها يبكي لها القاسي الجبار = ويحكي بها التلفاز في نشره اخباره
وانا لو شكيت الهم قدم البحر يحتار = تغور المياه وتنظر الناس محاره
وانا اللي بقلبي لو وضع في جبل سنجار = تفتت وذاب وخالط القاع بحجاره
همومٍ بقلبي وزنها جاوز المليار = عليها استعنت الله والنفس صباره
يعجز القلم يكتب على ويش انا صبار = وعيا الورق يحمل تواصيف جباره
انا ما كتبت الشعر طربان للاشعار= ولكن همومي خلت النفس تختاره









يقول علي : بعد ما وصلت الرياض اعلنت في بعض الصحف وكنا في عام 1397 هـ تقريباً وكان الاعلام على قده ولا فيه قراء .

يقول بعد ما اعلنت جاني فاعل خير وهو الشيخ فيصل ابواثنين من شيوخ قبيله سبيع ( الله يجزاه خير) وعرض علي اني اعيش عنده ويعتبرني مثل عياله لين احصل اهلي والا تنحل قضيتي .
عشت عنده حوالي سبع سنوات سجلت بعده عسكري واستقليت وهمي ملازمني كنت اتعجب من الناس اللي تضحك واقول في نفسي يا حظهم ما عندهم هموم .

رحت للدوحه واعلنت عن قصتي في الصحف ما لقيت احد يسأل عني بعدها رحت للأمارات ونفس الوضع ما احد فيها يعرف عني أي شي بعدها صارت ازمة الكويت ورجعت للسعوديه وبعد ما انتهت الحرب قلت ليش ما اروح للكويت احظر الاحتفالات بعد الحرب اخفف من همي ومنها اعلن هناك يمكن احص نهايه لمعاناتي . ومن القصائد اللي قالها :




يالله يالله فرج ضيقة الخاطر = والنفس للحق يا معبود ترشده
انت الكريم الرحيم العالم القادر = تفرج لحالن تعذر من يساعدها
ياذا العزيز المغيث الواهب الخابر = الطف بروحٍ مصايبها تطاردها
يامالك الملك ياحنان يا ساتر = منك المعونه غريب الدار ينشدها
انت الحليم العظيم الدايم القاهر = عبدك حياته بعض ما صار ضاهدها
يارب يارب فرج عقدة الصابر = اللي حياة السعاده صار فاقدها
من ما جرا لي غديت بدنيتي حاير = مدري علام العنا روحي تعهدها
عايش حياتي غريب الامس والحاضر = واترك حقوقي وانا بالعين اشاهدها
سيف الليالي بوجهي دايماً شاهر = دنياً تعجز حيات اللي يجاهدها
اقضي الليالي وانا مع وحدتي ساهر = وافراح عمري غرابيلي تبعدها
راحت حياتي وانا بين الأسى عابر = واحداث الايام تفتلي سواعدها
دايم وجوي بشينات الوفق غابر = واساير ايام عمري في مناكدها
صارت حياتي قضيه ما لها آخر = وابسط معالم حياتي ضاع راشدها
حاولت اقاوم ولكن الزمن ماهر = فرحات عمري مع الاحزان بددها
ارجي لعل وعسى ياتي الفرح باكر = وسنين الاحزان بالفرحات اجددها
مير الحقيقه غريمي دايماً شاطر = كل ساع نفسي بغراته يواعدها
والناس تحكم على الانسان بالظاهر = وانا حياتي عجزت الحق مقاصدها
قضيت عمري وانا باسم الأمل ناطر = وازرع بقاعٍ وانا جاهل مواردها
وانظر واراقب لنجمٍ بالسما سامر = واغيوم ياسي تقاصدني واقاصدها
مليت انا ذا الحياه اللي علي تامر = وقدرت اخالف لأوامرها واعاندها
برجع وادور عن اصلي في بلد جابر = واخلي الاصنام تقعد في معابدها
مالي وما السوالف وارد وصادر = ببعد عن اللي مساليكي يعقدها
للنفس رغبه ولكن الدرب عاسر = مانالها غيربس زايد توجدها
ومن كثر ما قد جرا لي ماني بذاكر = من وين وامنين سكاتي واخلدها
كثر المشاوير حيلي خلته فاتر = لا شك للنفس غاياتٍ تراودها
ارمي بالاول ويطلع رقمي العاشر = عيت تصيب الهدف لو كان اسددها
مكتوب اعايش حياتي دايم مغامر = امشي دروبي وانا جاهل معاودها
هذا نصيبي اعيش الواقع مهاجر = باحضان دنيا تهددني واهددها
ما هو بلازم اصير بدنيتي تاجر = ولاهو بفروض نفسي دايم اجهدها
يرزقني اللي لفضله حاقٍ وشاكر = بس من هو اللي يرا النعمه ويحمدها
ياربي انت الوحيد الرازق الناصر = الطف بعبدٍ حياة الهون زاهدها
مالي سوا رحمتك يا خالقي ذاخر = وفق حياتي وفي طاعتك تسعدها
هذا وصلوا عدد ما ينزل القاطر = على رسولٍ دروب الحق مهدها

منقول

[align=center]بارك الله فيك اخي الفاضل

لكن حبذا لو تاتي بالبقية

و جزاك الله كل خير[/align]