خايفة على اولادي...هل يرثون المس مثلي؟؟؟

السلام عليكم ورحمة الله وبركاته


انا وحدة من الناس ابتليت بالاحساس بالجن او رؤيته اومعاشرته لي...

وانا طفلة شفت الجن بشكل كلب بحمام مهجور كنت بلعب انا وصديقاتي كنا بنلعب الغماية رجعت وحدة منا تبكي وتحكي في صوت عند الحمام رحنا كلنا نشوف الصوت فتحنا الباب شفنا كلب ضخم كبير يمكن انا شفته ضخم لانه كنت صغيره ونبح علينا هربنا وهو لحقنا كانوا امهاتنا جالسين سوا بحوش البيت وعلى فكرة كان بيتنا هذا بيت قديم ولما شافونا بنصرخ وبنهرب صاروا يسموا علينا ويحكوا مالكم كلنا اتخبينا وحكينا في كلب عم يلحقنا حكولنا مافي شي وما شفنا شي وراكم طبعا الامهات فهموا فسموا علينا وروحوا على البيت...

وغيرها علامات شفتها وانا صغيرة بذكر اكثرها خوفني وبذكره لهذي اللحظة كنت بحديقة البيت كانت الدنيا ليل شفت على ارتفاع متر ونص فوقي ضوء اصفر الغريب انه ما اله وهج فقط دائرة صفرا مضيئه طارت فوقي واختفت بسرعة خفت ورحت ابكي بس كبرت عرفت شو هي..

اول زواجي سكنت ببيت كان مسكون وكنت اشوف واسمع شغلات خلتني اطلع منه وما ارجعله ونقلت لبيت تاني وظهرولي بالحلم كانوا اثنين وطردتهم بالحلم قرات اية الكرسي بصعوبة لحتى طلعوا برا البيت تعبت وانا بقرئها بالحلم وطلعوا من باب البيت..

ما راح اطول عليكم في كتير قصص بس اختصرت لكم قصتي مع رؤيتهم حتى تتفهموا مشكلتي وخوفي على اولادي..

الحمد لله على كل حال لكن اخاف على اولادي خاصة بنتي عمرها 8 سنوات وهي صغيره بعمر 3 سنوات كانت تصحى بليل تبكي بكاء بدون دموع وبدون توقف تبكي وما ترد علينا ولاكانها سامعتنا ولا تنظر النا كانت يوميا تصحى بنفس الوقت باليل الساعه 3او 4 وجه الصبح الفجر وتبلش بكاء بشكل غير طبيعي وزي ما خبرتكم بدون دموع واحاول كل الطرق لتهدئتها بدون فايدة لدرجة بيوم من كثر ما بكيت شدت على حالها حسيتها راح تتشنج خفت وعلى طول رحت لوالدي اهلي ساكنه انا جنبهم والدي طبيب لما شافها ما وصفها الا حاله نفسية واعطاها مهدىء..

انا ما اقتنعت انها حاله نفسية لانه بنتي ماشاء الله عليها عايشة احلى عيشة ومدلعه وما صابتها الحالة الا لما نقلت للبيت يلي انا حاليا فيه وهو بنفس عمارة اهلي كان لجارة ساكنة فيه عندها الله يشفيها انفصام شخصية وكانت تتخيل شغلات كتيرة تحصل معها وطبعا ما كانت تحصل وكانت تتخيلني انا بدخل عليهم وانا شبه عريانة الله يسامحها ...المهم كانت كتير تستخدم بخور ريحته كريييييييييهة حالها كحال كل الناس هون عنا بجهلوا انواع البخور يلي بتجلب الجن ويلي بتنفرهم فاكثرهم بستخدم بخور ريحته كريحه فيها فاسوخ وشبه اعتقد وشغلات غير..

من كثر مشاكلها وبعد سنة قدر والدي يطلعهم من العمارة وطلب مني انا اسكن مكانها لانه قرر ما يسكن احد غريب بالعمارة ومن هون بدت معانات بنتي ...

انا لما دخلت البيت حسيت بكبت وكانه مخنوقة وصرت ابكي ما بدي اسكن البيت كرهته وخايفه منه لكن خلص هذا الحل الوحيد لانه زوجي بسافر كتيررر حتى ما ابقى لحالي انا واطفالي هيك بكون جنب اهلي..

اول ما سكنت بالبيت حلمت حلم غريب انها انا وزوجي وبنتي وابني موضوعين بداخل مرتبان مثل المخلل زوجي وابني بمرتبان وانا وبنتي بمرتبان لحالنا وكنت انا وبنتي مطعونين بقلبنا ويلي وضعنا بالمرتبان هي الجارة هذي...

المهم ضلت بنتي على هالحالة تصحى باليل تبكي لحتى ما قررت انام عندهم بالغرفة واشوف بنتي ليش بتصحى بتبكي نمت جنب بنتي شوي واحس حالي بين الصاحية والنايمة مش قادرة اقوم او اصحى سمعت صوت وحدة وشفتها لانه كنت شبه مفتحه عيوني كانت زي قطعة قماش سودا زي العباي طايره فوق اولادي بتحكي اصحايلك بنتك وصارت تضحك ضحكة شماته وفعلا ثواني وبنتي صارت تصرخ وتبكي صحيت بسرعه سميت عليها واخدت اولادي يناموا عندي...

بعد فترة صحيت بنتي تبكي من النوم كالعادة بس كنت انا قارئه عليها هون قدرت تحكي كانت تحكي اي اي واوا واوا يعني متألمة وماسكه ذراعها وبتبكي وخايفة بحكيلها مالك شو يلي بوجعك بتحكيلي هاي البسة ماما عم تخرمشني اااي واشارت للامام طبعا لافي بسة(قطه) ولا شي يمكن بسم الله هي الجنية ما غيرها عم تزعج بنتي..

شغلت سورة القرا بغرفتهم لمدة ثلاث ايام وكنت اقرأ عليهم قبل النوم ..

المهم مرت السنين وحصلت امور كثيرة ما راح اذكرها الان لكن يلي لفتني حلمين حلمتهم واحد اليوم حلمته والتاني قبل اسبوعين..

اليوم شفت حالي انا واولادي ببيتي بس بيتي مخيف خايفة انا منه فيه شيء حاسه بوجود حد بس خفي شوي واشوف ابني وبنتي بمشوا مع ولد غريب بمشوا بالصالة انا بس شفت الولد خفت وسميت وحكيت سلام قول من رب رحيم ... على طول الولد انتفض وترك اولادي وهرب وراح للبلكونه ورمى حاله برا البيت بنتي خافت حكت ماما رمى حاله حكيتلها هاد شيطان جن لاتخافي ... كان الولد بمشكي مع ابني ابني عمره 9 سنوات..والولد بعمره ..

اما الحلم التاني قبل اسبوعين شفت حالي بمول نظرت للاعلى شفت وحدة متسلقه على اضوية المول منظرها مخيف خفت اجت عيني بعينها هربت صارت تلحقني وصلت لبيتي طبعا بيتي على الطابق الثاني فكان لازم اصعد الدرج او السلم..اول درجات كانوا بسرعه لكن لما وصلت عند اخر درجات صاروا رجولي ثقاااااااال وفيهم الم احاول ارفعهم حتى اوصل باب بيتي وادخل واحمي نفسي كنت متثاقلة وبجاهد وبحاول وشفت بنتي بتحكيلي يلا ماما حاولي يلا لحتى وصلت وسكرت الباب بعدين سمعت حد بحكيلي استخدمي العصفر الورق ونبات القمح الناشف يعني ساقها كاملة السنبله يعني انه اغرسهم بتراب واخليهم وحدة بغرفة بنتي وحدة بغرفتي مش زراعة لاء لانه العصفر ناشف وبرضوا سنابل القمح..

انا بعد كل هالقصة حبيت احكيلكم خاااااااااااايفة على اولادي خاصة البنت لانها صارت شغلات غريبة بحس انها يمكن ملازمها حد الله يحيمها يارب ....

فهل ممكن فعلا ينتقلوا لاولادي؟؟؟ وبرايكم شو معنى الاحلام الاخيره؟؟؟ قسم الاحلام وضعت فيه حلم قبل اسبوعين برضوا ما فسروه للاسف...

انا بشغل الرقية الشرعية بالبيت بصوت عالي دائما وقبل ما يناموا بستودعهم الله ليحفظهم..