حالتي، مأسآتي، معاناتي ،،،

السلام عليكم ورحمة الله وبركاته
تحية طيبة،،،

بشرح لكم حالتي انا عمري 23 سنة من قبل ثلاث سنوات تغير حالي وصرت امر باشياء مايعلم فيها الا الله ضيقة بصدري والام غريبة ونفسيتي في تدهور الحين لي سنة بديت في مرحلة اتعبتني جدا جدا هي اني اذا اجتمعت بالناس او اذا كلمت احد ماعرف اتكلم ماعرف اعبر واحس ان الدنيا تدور فيني، واحب اجلس لوحدي وصرت افضل العزلة عن الناس تماما والاصوات تزعجني على اني ماكنت كذا ابدا كنت انسان اجتماعي لابعد الحدود ومرح واحب الضحك ومتكيف مع الحياة بشتى انواعها وضغوطاتها وكنت انا اضيف على الاجواء اللي اكون متواجد فيها المرح وافتح سيرة المواضيع المسلية واحسن اختيار المواضيع وادارة النقاش ومؤدب في الحوار مع اي احد ماحب الروتين والملل ولا كنت اعرفه ولاكنت اعترف بالامراض النفسية وبعيد عنها كل البعد وكنت انسان طموح كل يوم طموحي عالي ومعنوياتي عالية والحين الله العالم بحالي تغير كل شيء فيني وصرت مافرح للاشياء اللي تفرحني وطول الوقت على النت كل يوم ادور عن سبب لحالتي والان وحيد لاعندي اصحاب ابتعدت عن الكل وهربت من الواقع لاني صرت افتقد للثقة في نفسي ولا اعرف اتكلم حتى اللي يقعد معي يمل مني طول الوقت ساكت حاس اني غير الناس وكل مرة احاول اني اطلع نفسي من المتاهة اللي انا فيها بس كل شيء ضدي ماحد يقدر يفهم معناتي ويحس فيني الا انا، انا احس ان فيني اعراض الامراض النفسية واللي هي الاكتئاب من حزن وشعور بالذنب من غير سبب وصداع وكتمة والحين صرت ادخن بشراهه، وتفكيري سلبي واحاسب عمري عن الصغيرة والكبيرة والوسواس كل ماله يصير اقوى من قبل من تفكير منحرف واشياء غريبة تسيطر على عقلي غصبن علي افكر افكار غبية واتخيل حاجات مقرفة جدا بس غصبن علي صرت اشوف الدنيا بحزنها وفرحها شي واحد، الكل يقولون ان فيني عين ماصلت على النبي وانا اقول وش بيعطوني عين عليه، صح اني كنت وسامتي فوق المتوسط وكنت ذكي ومرح واجتماعي وماحد يمل مني وطموح بس ماعتقد انها عين، ذهبت لشيخ وقرا علي وسوالي فصد ليدي اليسار وارتحت وطلع دم اسود كثير حتى الكاس اللي كان حاطة على ايدي طار وانكب الدم وتناثر على ثوبي وعطاني علاج مدتة 21 يوم واستخدمتة 10 ايام فقط هذا الكلام قبل سنة تقريبا وارتحت نسبيا وخليتة لظروف العيد واللي اذكرة من العلاج (الصبخة توضع على الرأس لمدة 12 ساعة وبخور وزيت وسدر وموية صفرا معها زعفران وما ورد وزمزم الظاهر، لكن ماكملت العلاج وكنت اعرف مفسر احلام من مكة الله يجزاه خير ذاك الادمي والله العظيم فسرلي كل حلم بدقة متناهية وكل تفسيراته صائبة، وبعد ماخليت العلاج حلمت حلم وفسرة بان حالتي سوف تتدهور وتنتكس اقوى وادهى من قبل، وفعلا قسم بالله الى يومي ذا ماعاد اعرف راسي من كرياسي فقدت هويتي حتى صوتي تغير من قو التدخين صدري تعب كثير وانا حاس فيه يالله اتنفس ومع ذلك اقول في نفسي التدخين بيسبب لي السرطان والسرطان بيذبحني = اني برتاح من هالعذاب !!، وانا اعرف اني على غلط، بس الحين مادري ايش فيني بالظبط حتى اني صرت اقرى عن ادوية نفسية واشتريها بدون وصفة اخر علاج الفافرين للوسواس القهري والله لعب فيني زاد الطين بله وقطعتة وعلاج ثاني ريميرون استخدمة عشان انام بسرعه بدون تفكير وقلق وارق، اللي ابي اعرفه الحين هل انا مريض نفسي او مريض روحي(مس،عين،سحر)، والله اني ارجح دائما ان فيني عين لكن اعراضها بعضها اختفى الحين وبديت في مرحلة اشد واقوى من الاعراض اللي راحت، والله يانا منقهر قهر لايعلم فيه الا الله سبحانة يعني مستقبلي بيضيع واحلامي بتتبخر قدامي وانا مكتفه يديني، طيب ليش من السبب من اللي عطاني عين حسبي الله عليه ليوم الدين والله ماخلية على كثر الغلبة والحرقة والظلم اللي مريت فيه ان شاء الله حتى لو كنت من اهل النار ماني مخلية والله لدعي ربي كل يوم يقتضي لي منه مابي من الحياة الا ان يقتضي من هذا الحاسد وابي من ربي حبيبي خالقي وموجدني على هذه البسيطة انه يرحمني ويرأف بي انا من لي غيرك يارب وغيركم، دلوني على راقي مهم وضروري والله محتاج وماعرف احد والراقي اللي كنت اتعالج عندة وقف عن الرقيا مدري ليش بس عطوني رقم شيخ ياليت في شرق الرياض ابي اتعافى الى متة وانا مهمل نفسي، والله اني اشكي من قهري وعجزي وشتاتي ادري ان الشكوى لغير الله مذلى بس مافي يدي حيلة، وصلت لمرحلة اني ماعرف ادعي حتى ودي ادعي بس ماقدر وماعرف الا الله يشفيني والله يعافيني، آمل ان توقفوا معي وقفة اخوان وربي مانساكم من صادق الدعاء اذا تشافيت ربنا يوفقكم ويسدد خطاكم، المعذرة على الاطالة،،،
حفظكم الله.